Bakı 35° C Temperatur

71

4m/s

  • USD1.7000
  • EUR1,9297
  • RUB0,0247
  • NEFT$39.41
^
XƏBƏR LENTİ

LATVİYADA “AZƏRBAYCAN TİCARƏT EVİ” AÇILIB

23-07-2018, 19:13 Baxış: 369
LATVİYADA “AZƏRBAYCAN TİCARƏT EVİ” AÇILIB

Bu gün Latviyanın paytaxtı Riqada Azərbaycan Ticarət Evi açılıb. 

İqtisadiyyat Nazirliyinin verdiyi xəbərə görə,bununla əlaqədar təşkil olunmuş tədbirdə hər iki ölkənin rəsmi şəxsləri, Azərbaycan-Latviya parlamentlərarası əlaqələr üzrə işçi qrupunun üzvləri, sahibkarlar iştirak ediblər.

Azərbaycan Prezidentinin müvafiq tapşırığının icrası olaraq İqtisadiyyat Nazirliyi tərəfindən yaradılmış Azərbaycan Ticarət Evi "Made in Azerbaijan” brendinin Latviya bazarında daha çox tanıdılmasına, Azərbaycan məhsullarının ixracının təşviqi və genişləndirilməsinə dəstək göstərəcək, Latviyada satışını təşkil edəcək, bu sahədə əlaqələndirməni həyata keçirəcək.

Ticarət Evində Azərbaycan şirkətlərinin müxtəlif növ məhsullarının sərgisi təşkil olunub. Daimi fəaliyyət göstərəcək sərgidə Azərbaycan şirkətlərinin istehsal etdiyi 70 çeşidə yaxın şərab məhsulları, 26 çeşiddə konyak, 10 çeşiddə araq, 26 çeşiddə çay, 23 çeşiddə meyvə şirələri və kompotlar, 70 çeşiddən çox digər məhsullar, o cümlədən bitki yağları, zeytun, fındıq, düyü, meyvə-tərəvəz, tekstil və kosmetik məhsullar, sənaye malları, turizm xidmətləri nümayiş olunur.

Açılış mərasimində çıxış edən iqtisadiyyat nazirinin müavini Sahib Məmmədov Latviyada Azərbaycan Ticarət Evinin açılmasının dövlət başçılarının iki ölkə arasında iqtisadi-ticarət əlaqələrinin inkişafına verdikləri böyük önəmin, Latviyada Azərbaycan məhsullarına olan marağın göstəricisi olduğunu vurğulayıb. Qeyd olunub ki, qarşılıqlı hörmət və dostluq prinsiplərinə əsaslanan Azərbaycan-Latviya əlaqələri uğurla inkişaf edir. Latviyada Azərbaycan Ticarət Evinin açılması iki ölkə arasında iqtisadi əlaqələrin genişləndirilməsinə mühüm töhfə verəcək.

Azərbaycanın Latviya ilə investisiya əməkdaşlığından danışan S.Məmmədov qeyd edib ki, Azərbaycan tərəfdən Latviyaya 164 mln. dollar, Latviya tərəfindən Azərbaycan iqtisadiyyatına 84 mln dollar həcmində sərmayə qoyulub. Azərbaycanda tikinti, xidmət, sənaye, rabitə, nəqliyyat, ticarət, bank və sığorta sahələrində 40 Latviya şirkəti fəaliyyət göstərir.

Latviyanın Azərbaycan-Latviya hökumətlərarası komissiyanın həmsədri, Latviyanın nəqliyyat naziri Uldis Auqulis Riqada Azərbaycan Ticarət Evinin fəaliyyətə başlamasının ikitərəfli iqtisadi əlaqələrin inkişafında mühüm addım olduğunu, ölkələr arasında iqtisadi əməkdaşlığın və işgüzar münasibətlərin inkişafında əhəmiyyətini vurğulayıb. 

Azərbaycan-Latviya Parlamentlərarası Dostluq Qrupunun rəhbəri Kamran Bayramov Latviyada Azərbaycan Ticarət Evinin açılmasının iki ölkə arasında iqtisadi əlaqələrin inkişafında önəmini vurğulayıb, iş adamlarını bu imkandan yararlanmağa dəvət edib.

Tədbir çərçivəsində Azərbaycanın "Kaslar” MMC və "Bina Aqro” MMC şirkətləri ilə Latviya şirkətləri arasında Azərbaycan istehsalı olan məhsulların Latviyaya ixracına dair Anlaşma Memorandumları imzalanıb.

Sonra tədbir iştirakçıları Azərbaycan Ticarət Evi və burada daimi fəaliyyət göstərən Azərbaycan məhsullarının sərgisi ilə tanış olublar.

Səfər çərçivəsində Azərbaycan nümayəndə heyəti Latviya Baş nazirinin müavini, iqtisadiyyat naziri Arvils Aşeradens ilə görüşüb, ikitərəfli iqtisadi əlaqələrin mövcud vəziyyəti, perspektiv əməkdaşlıq imkanları barədə müzakirələr aparıb.